Музей традыцыйнага ручнога ткацтва Паазер`я

Музей адчыніў свае дзверы для наведвальнікаў у снежні 1998 года ў будынку па вуліцы Войкава, д. 1, які з'яўляецца помнікам архітэктуры канца ХІХ — пачатку ХХ стагоддзя.
Музей распавядае пра асаблівасці ручнога ткацтва канца ХІХ — пачатку ХХ стагоддзя на Паазер'і — гэта значыць у Полацкім, Глыбоцкім, Міёрскім, Шаркаўшчынскім, Верхнядзвінскім, Пастаўскім, Докшыцкім раёнах Віцебскай вобласці.
Экспазіцыя, што змясцілася ў трох залах, асвятляе традыцыйны працэс стварэння тканых вырабаў ад пасадкі лёну да атрымання гатовага вырабу. Праз фальклор, абрады, звычаі раскрываецца вялізны культурны пласт, які нясе ў сабе ткацтва.
Стрыжнем экспазіцыі лічыцца Сусветнае дрэва. Гэты матыў сімвалізуе бясконцае жыццё і вечнасць. Дрэва — адмысловае звяно, што злучае чалавека і Сусвет. Карані Дрэва кажуць пра непасрэднае вырошчванне лёну і яго першасную апрацоўку. Ствол сімвалізуе працэс стварэння тканіны, а крона апавядае пра таямнічы свет сімвалаў і знакаў, адлюстраваных у легендах і паданнях.
Сёння Музей традыцыйнага ручнога ткацтва Паазер’я запрашае на аглядавыя і тэматычныя экскурсіі, праводзіць шматлікія музейна-педагагічныя заняткі, батлеечны спектакль «Цар Ірад». Аматарам даўніны, аўтэнтычных беларускіх спеваў і традыцыйных беларускіх гульняў і танцаў музей прапануе паўдзельнічаць у штогадовых фальклорных святах: Калядах, Гуканні Вясны, Валачобніках, Багачы. А маладыя пары музей запрашае прайсці стылізаваны старажытны вясельны абрад «Як зліліся дзве рэчанькі...», скіраваны на забеспячэнне дабрабыту новаўтворанай сям’і. Для дзяцей і дарослых праводзяцца разнастайныя майстар-класы па традыцыйных рамёствах.